و اسقرلات و يشب و مرجان و ارسلان و قيلان و باركير اتلريدر اول سرحده اولان لشكره ويررلر و اعلا اتلرك يانلرينه خانبالغه يوز منزل يردن تعظيم و توقيرلريچون ادملر قوشوب صاحبلريله دركاه عالميناه خاقان چينه كوندررلر و هراته اون‌ايكى خدمتكار تعيين ايدرلر انلردن التى نفرى رنكارنك فانوسلرى رنكين و منقش نيزه‌لره باغليوب اتلرك صاغ و صولنده يوررلر و باقى قلان التى نفرك اوچى باشنه و صاچنه و اوچى قوير وغنه وحشكيسنه خدمت ايدرلر و ارسلانك اون ات اعتبارى و پارس و سياه كوش ارسلانك نصفى اعتبارلرى واردر مثلا هديه‌سى ارسلان اولنه اوتوز صندوق مال ويررلر و صندوقلرده اطلس و كمخا و پاى برك و سائر امتعه يه دائر لباس و اوزنكى حتى مقراص و بچاق وايكنه يه وار نجه ويررلر و قيلان و قره قولاق كتورنلره ارسلانك نصفى مقدارى احسان وات كتورنلره عشرى مقدارى انعام ايدرلر و اول كمسنه‌لرك هربريسنه ذكر اولنان پيشكشلردن ماعدا برقاتر يوكى اطلس و كمخادن قماش ويررلر و بربرى اوزرينه رنكارنك اوج خلعت ويررلر كه بريسى ايكى كمسيه خلعت اولور و ذكر اولنان خلعتلرى مست و پاپوشه وار نجه بله انعام ايدرلر فصل و خطاييلر نسل و اولاد قابلدندر كه قرنداسى هابلى قتل ايتدكده حضرت ادم عليه السلام قصاص ايچون قابلى قتل ايتمك قصد ايتدكده قابل قاچوب چين ارضنه واردى وانده متمكن اولوب بعد زمان اولاد و انسابى اول ولايتده بىحد و حساب اولدى الان فى هذا الزمان كين طاى خاقان حضرت سيد انبيا و سند اصفيا محمد المصطفى عليه الصلاة و السلام افندمزى واقعه سنده كورديكى انك قلبنى چقاروب يودى وينه يرينه قويوب اكا ايمان تلقين ايلدى بعده بيدار اولدقده سرايك ديوارنده يشل خطله كلمهء شهادت يازلمش كوروب خاص خدمه سى اولان اهل سرايك جمله سنه و قوعحالى بيلدر دكده اهل سرايك جمله سى بىتوقف ايمان كتورديلر اكرچه انك ابا و اجدادى نيجه بيك ييل كفر طريقنده سلطنت سورديلر ايسه بو كاغايت عدلندن سعادت و سلطنت اخرت دخى نصيب اولدى و نيرون سرايده اولان امرا و وزراسنه خط يازوب واقعه سيندن خبر ويروب ديديكه بوقدر بيك ييلدر اهل مشرق ظلمات كفر ايچنده قالمشلر حالا بنم قلبمده نور ايمان درخشان اولوب نسل و اولاد فغفور چينده بو سعادت بكاميسر اولدى اكر سزكدخى كمال عقل و دانشكز وارايسه بود ولته نائل اولوك ديدى وزرا و امرا و سائر